Үөгэн оскуолатыгар Алтынньы 23 күнүгэр Ийэлэр күннэригэр аналлаах “Ийэм миэнэ – бастыҥ дьүөгэм” диэн оонньуу буолан ааста. Тэрэээһини физическэй культура учуутала Келин Николай Николаевич кыыһын, 7 кылаас үөрэнээччитин, Келина Нарыйаананы кытта иилээн-саҕалаан ыытта. Ийэлэр кыргыттарынаан, кырдьык да дьүөгэлии буолан, үөрэ-көтө оонньоотулар, мультфильм ийэлэрин таайдылар, куукула суулаатылар, сурунаалы кырыйан таҥас оҥордулар, ырыалары таайдылар, оҕолор төрөппүттэрин кыра эрдэҕинээҕи хаартыскаларынан көрөн биллилэр. Ийэ уонна кыыс истиҥ сыһыаннара, сатабыллара көрөөччүлэри кэрэхсэттэ. Ол курдук, Аммосова Лиана ийэтинээн суумка арааһын тигэллэр эбит, Гоголевтар ПВА килиэйи натрия тетрабораты кытта холбоон лизун диэн оонньууру оҥорон көрдөрбүттэрин сэргээтибит, Келина Ньургуйаана ийэтинээн үҥкүүлээн дьон биһирэбилин ыллылар, Кузьмина Айыллаана эбэтинээн алмазнай мозаика хомуйан кэлбиттэр, Деляева Груняҕа ийэтэ кылгас кэм иһигэр кумааҕыны килиэйдээн бэрт тупсаҕайдык былааччыйа оҥорон кэбистэ.

Тэрээһин өссө биир сэргэх түгэнинэн торт күрэҕэ буолла. Манна төрөппүттэр, оскуола үлэһиттэрэ бисквит, тирамису, мүөттээх, ассорти курдук торт эгэлгэтин астаан аҕалбыттар. Төрөппүт Алексеева Оксана Гаврильевна астаабыта саамай кыраһыабайынан сыаналанна. Тортары математика учуутала Сайына Гаврильевна кэлбит ыалдьыттарга аукционнаан атыылаата.

Үөрэнээччилэр “Ийэм кэлиэн иннинэ”, “Биһиги маамабыт”, “Ийэ баар буолан”, “Ийэ мичээрэ” диэн ырыаларынан ийэлэри эҕэрдэлээн киэһэни киэргэттилэр.

Күрэх түмүгүнэн Антонина Павловна уонна Лиана “Бастыҥ дьүөгэлиилэр” ааты ыллылар. Бары кыттааччылар сакалаат, тэтэрээт бириис туттулар, ийэлэр лотереяҕа оонньоон хаһаайыстыбаҕа наадалаах маллары сүүйдүлэр.