Сэтинньи 8 күнүгэр саха тылын үөрэҕэр сир-дойду ааттарын үөрэтиини төрүттээбит кыраайы үөрэтээччи М.С.Иванов – Багдарыын Сүлбэ төрөөбүтэ 90 сылын туолуутугар «Алаас ааттаах, дойду сурахтаах» диэн семинар буолан ааста. Манна үөрэнээччилэр төрөөбүт түөлбэлэрин топонимикатын үөрэтэргэ холоннулар. Ол курдук, оҕолор эрдэттэн үллэстэн Таастый, Сыылбыт, Күбээдьийэ, Үөгэн (Ударник), Чөкө алааһа, Сайыы, Бырдьыкы, Муоҕан, Эбэ, Мааппа Халдьаайыта, Чөкчө, Улукуччу, Тэтиҥ, Улахан Тэтиҥ диэн чугастааҕы сир-уот, күөл, үрэх, алаас аатын-суолун быһааран иһитиннэрии оҥордулар. Кинилэр бэриллибит сир тоҕо итинник ааттаммытын, туох суолталааҕын, историятын төрөппүттэриттэн, аҕа саастаах дьонтон ыйыталаспыттар, библиотекаттан матырыйаал хомуйан бэлэмнэммиттэр. Березкина Милиана, Деляева Груня уонна иккис кылаас үөрэнээччилэрин иһитиннэриилэрэ ордук интэриэһинэй диэн бэлиэтэннэ. Бу тэрээһиҥҥэ төрүт олохтоох ытык-мааны киһи Матаркин Семен Егорович ыалдьыттаан, оҕолору истэн, кинилэр кэпсээннэрин ситэрэн-хоторон биэрдэ.