Үөгэҥҥэ Комсомол 100 сыла
Ыччат Бүтүн Сойуустаа5ы Ленинскэй Коммунистическай Сойууһа төрүттэммитэ 100 сылыгар аналлаах тэрээһиннэр дойду үрдүнэн киэҥ далааһыннаахтык ыытылыннылар. Ол чэрчитинэн, Үөгэн нэһилиэгэр алтынньы 29 күнүгэр Комсомол төрөөбүт күнэ бэлиэтэннэ. Тэрээһини оскуола оҕолоро Федор Лобанов хоһоонунан арыйдылар. Комсомол ыстаал кэккэтин хаҥаппыт, кэлэр кэм килбиэнин уһансыбыт ытык-мааны дьон ыҥырыылаах ыалдьыт буоллулар. Ол курдук, Үлэ бэтэрээнэ, Саха Республикатын культуратын туйгуна, 50-с сыллардааҕы Маленков аатынан колхоз комсомольскай тэрилтэтин сэкирэтээрэ Егорова Евдокия Егоровна, Российскай Федерация норуотун үөрэҕириитин туйгуна, Челябинскай атомнай станцияҕа тахсыбыт саахал содулун туоратааччылартан биирдэстэрэ Кутяркин Владимир Гаврильевич; 80-с сыллардааҕы Үөгэннээҕи I сүһүөх комсомольскай тэрилтэ сэкирэтээрэ Кобельянова Екатерина Васильевна; 1965 сылтан комсомол кэккэтигэр киирбит, “Орленок” лааҕырга үлэлээбит комсомолец Матаркина Светлана Дмитриевна күргүөм үлэ күрэхтээх, өрүү бастыыр үгэстээх кэрэ кэмнэрин ахтан-санаан, оҕолорго, ыччакка сүбэ-соргу гынан кэпсээтилэр. Владимир Гаврильевичка “Сэбиэскэй Армия 100 сыла” мэтээл, Евдокия Егоровнаҕа “ЫБСЛК 100 сыла уордьан” туттарылынна.
Тэрээһин иккис чааһа, бырааһынньыктааҕы эҕэрдэ кэнсиэр, ансамбль толоруутугар “Эн комсомол – мин дьолум” ырыанан саҕаланна. Кэнсиэри Юрий Кузьмин, Роман Ефимов, Асияна Семенова, Варя Мыреева, Сайыына Бурцева, Антонина Бурцева ырыанан, үҥкүүнэн киэргэттилэр.
Мустубут дьон-сэргэ, ордук оҕо аймах «Эн комсомол – мин дьолум» кинигэ быыстапкатын, «Комсомол 100 сыла» стендэни, “Кэм кэрэһиттэрэ” диэн 70-90 сыллардааҕы мал-сал быыстапкатын, “Эдэр саас сүппэт бэлиэтэ” хаартыска стендэтин кэрэхсээн көрдүлэр.
Уостубат уотунан сүрэхтэри умаппыт, үрдүккэ тардыһар күүстээх баҕаны күөдьүппүт, туйгун, бастыҥ ыччаты биир сомоҕо түмпүт улуу Комсомол күүрээннээх күннэрэ ахтыллан, эдэр саас эрчимин эргитэн эйэ, дьол ырыата ылланан Комсомол 100 сылын туолар өрөгөйдөөх күнэ өрө көтөҕүллүүлээхтик ааста.
