“Кэхтибэт кэрэкэ тылларым…”
(П.А. Ойуунускай төрөөбүтэ 125 сыла)
Саха норуотун чулуу уола, общественнай, государственнай деятель, революционер, саха сэбиэскэй литературатын төрүттээччи Платон Ойуунускай төрөөбүтэ 125 сыла республика үрдүнэн киэҥ далааһыннаахтык бэлиэтэннэ. Биһиги оскуолабытыгар бу күнү өрө көтөҕүллэн, долгуйан көрүстүбүт. Оскуола улахан оҕолоро, сэттис-ахсыс кылаастар суруйааччы олоҕун, айар уонна тэрийэр үлэтин хаартыскалаан кэпсээтилэр. Онтон учууталлар, үөрэнээччилэр Ойуунускай олоҕун кэрчиктэригэр дьүөрэлээн өлбөт-сүппэт хоһооннорун өйтөн аахтылар. Ол курдук, “Доҕорбор Сүөкүччэҕэ” диэн поэт маҥнайгы тапталыгар, кэргэнигэр анаабыт хоһоонун математика учуутала Сыромятникова С.Г. аахта. Гоголева Ага (8 кылаас) “Өрүөл кэриэһэ”, Аммосова Лиана (5 кылаас) “Алгыс”, Келина Ньургуйаана (3 кылаас) “Күн көрө”, Кузьмина Айыллаана (2 кылаас) “Кэлэр кэскил ырыата”, Бурцева Зарина (5 кылаас) “Москуба”, Еремеева Ф.И. (алын кылаас учуутала) “Былааһы сэбиэккэ!”, Аянитова Е.А. (нуучча тылын учуутала) “Көҥүл ырыата” диэн өрө күүрүүлээх, сүгэ-балта тыллардаах айымньыларын ааҕаннар Ойуунускай аҥар илиитигэр ыстыыктаах, аҥар илиитигэр бөрүөлээх революционер-суруйааччы буоларын итэҕэттилэр. Габышева Дайаана (6 кылаас), Деляева Лена (8 кылаас) эппит хоһоонноругар суруйааччы уоттаах-төлөннөөх араатар-трибун быһыытынан арылынна. Ону таһынан “Татыйык ыллыыра” диэн Ойуунускай оҕотугар анаабыт, поэзиятыгар хаһан да иһиллибэтэх кэрэ, нарын тыллардаах хоһоонун алын кылаас учуутала Чудинова Д.Л. долгутуулаахтык аахта. Маны сэргэ Келина Нарыйаана (8 кылаас), Алексеева А.А. (дириэктэри иитэр үлэҕэ солбуйааччы), Габышев М.Ф. (саха тылын учуутала), Попова А.Н. (биология учуутала) “Дорообо, туйгун кыыс Өрүүчэ”, “Син биир буолбаат?!”, “Бу уоттаах бакаалы”, “Ийэм Дьэбдьэкиэй уҥуоҕар” диэн аатырбыт хоһооннорун аахтылар. Бу тэрээһин улуу киһи туһунан кэпсээнинэн, араас хаартыскаларынан доҕуһуолланан, Ойуунускай тус олоҕо, үлэтэ-хамнаһа айар үлэтин кытта быстыспат ситимнээҕэ көһүннэ, кини кылгас эрээри чаҕылхай олоҕо, киһи быһыытынан кэрэтэ барыбытын өссө төгүл умсугутта.
Лена Деляева, Үөгэн сүрүн оскуолатын 8-с кылааһын үөрэнээччитэ
