Сааскы маҥнайгы бырааһынньыгы көрсө “Принцессалар күрэхтэрэ” буолан ааста. Күрэх остуоруйаттан түспүт принцессалар үкүүлэринэн аһылынна. Ол курдук, биһиэхэ ыалдьыттаатылар Аграба королевствотын кэрэ куота, Султан мааны кыыһа Жасмин (Аммосова Лиана), олоҥхоҕо хоһуйуллар тоҕус былас суһуохтаах туналҕаннаах ньуурдаах Туйаарыма Куо (Деляева Груня), атынан көтүтэр, ох саанан бэргэнник ытар хорсун кыыс Мерида (Габышева Дайаана), эйэҕэс санаалаах, дьикти-кэрэ Золушка (Кузьмина Айыллаана), амарах санаатынан аптаах замогы тилиннэрбит, абааһыны принцка кубулуппут Бэль (Гоголева Айта), айылҕа оҕото, индеец биис ууһун тырымнас сибэккитэ Покахонтас (Келина Ньургуйаана). Принцессаларбыт биһиги иннибитигэр ох курдук оҥостон, тап курдук таҥнан кэлэн бэйэлэрин билиһиннэрдилэр, талааннарын, дьоҕурдарын көрдөрдүлэр, принцка ас астаан аһаттылар, кистэлэҥнээх сундугу арыйдылар. Кинилэри эҕэрдэлээн принц (Келин Ньургун) “Күн бытархайа” ырыаны ыллаата, кыргыттар үҥкүүлээтилэр. Түһүмэхтэри король Михаил Федорович, королева Сайына Гаврильевна сыаналаан, бастыҥ принцессанан Покахонтас (Келина Ньургуйаана) ааттанна. Бу киэһэ оскуолабыт аптаах дыбарыаска кубулуйан, дьикти дойдуга, оҕо саас дойдутугар ыалдьыттаатыбыт.