Саргылаах сана дьыл алыптаах киэһэтэ

     Кэрэ кэһиилээх, ырыа-тойук аргыстаах саҥа дьыллааҕы күүтүүлээх киэһэни кэнсиэринэн саҕалаатыбыт. Бастатан туран, оскуолабыт дириэктэрэ, Алексей Алексеевич оскуола оҕолорун, төрөппүттэри, учууталлары, ыалдьыттары үөрүүлээх киэһэнэн эҕэрдэлээтэ уонна бу үөрэх дьылын түмүгүнэн ситиһиилэри сырдатта. Ол кэннэ Томпо оройуонугар ааһан эрэр сыл табаһыттар сылларынан биллэриллибитинэн сибээстээн, алын кылаас оҕолоро, уһуйааччыларын кытта таба үҥкүүтүнэн кэнсиэри арыйдылыр. Ол курдук саалаҕа мустубут төрөппүттэрин, учууталларын, күндү ыалдьыттарын үөрэнээччилэр саҥа дьыллааҕы ырыанан-тойугунан, араас үҥкүүнэн эҕэрдэлээтилэр. Кэнсиэри иилээн-саҕалаан ыыттылар: Степанида Михайловна, Андрей Васильевич Андросовтар уонна оскуола 8, 9 кылааһын үөрэнээччилэрэ Миша Кириллин, Айтал Степанов.

     Тохтобул кэмигэр Алексей Андреевич оонньуу оонньотон ыалдьыттары чуҥкуппата. Ол кэннэ “Тымныы Хотун дойдутугар ыалдьыттааһын” диэн саҥа дьыллааҕы кылааһынан инсценировка туруоруутугар күрэх буолла. Онно биһиэхэ тыа саарыстыбатыттан – эльфтар, уу саарыстыбатыттан – русаалкалар, сүллүүкүн, хайа саарыстыбатыттан – гномнар, аанньаллар саарыстыбаларарыттан – аанньаллар, пираат, хонуу саарыстыбатыттан – сир симэхтэрэ, муус саарыстыбатыттан – хаар дьоннор, Тымныы Хотун, Сайынчаана, Күһүнчээнэ, Саасчаана кэлэн ыалдьыттаатылар. Күрэх түмүгүнэн араас анал аатынан наҕараадаланнылар.

    Эрдэ биллэриллибит «Ыт – киһи эрэллээх доҕоро» тиэмэҕэ ыт туһунан дьиҥнээх буолбут  түбэлтэни сырдатан хаһыат оҥорууга алын сүһүэхтэргэ 3 миэстэни – 2, 2 миэстэни — 1, 1 миэстэни – 4 кылаас о5олоро ыллылар. Ортоку сүһүөххэ 3 миэстэни – 6-7 , 2 миэстэни – 8-9, 1 миэстэни – 5 кылаастар ыллылар. Ону таһынан, араас матырыйааллартан хаар киһи оҥордулар

      Буоларын курдук саҥа дьыллааҕы кэтэһиилээх ыалдьыттар Тымныы Оҕонньор, Хаарчаана кэлэн оҕолору эҕэрдэлээн, кэһии биэрэн үөрдэн-көтүтэн бардылар. Эҕэрдэ киэһэ оскуола оҕото, учууталлар, төрөппүттэр кыттыылаах улахан баалынан түмүктэннэ.

   Ол кэннэ минньигэс астаах кафеҕа аһаан, аттракционҥа оонньоон, сыал ытан, дьуолка тула астына үҥкүүлээн, үөрэн-көтөн тарҕастыбыт, саргылаах сана дьыл алыптаах киэһэтин түмүктээтибит.

Андросова С.М. – Үөгэн сүрүн оскуолатын математикаҕа учуутала